hasin kaun hai husn-e-dawam kis ka hai

hasīn kaun hai husn-e-davām kis kā hai

zavāl jis ko nahīñ hai vo naam kis kā hai

ye mai-kada ye surāhī ye jaam kis kā hai

barā-e-bāda-kashāñ ehtimām kis kā hai

shab-e-firāq munavvar hai kis ke va.adoñ se

diloñ meñ aas kī sūrat qiyām kis kā hai

nahīñ hai koī agar sub.h ke pas-e-parda

to intizār hameñ vaqt-e-shām kis kā hai

azal se hai jo dil-e-kā.enāt kī dhaḌkan

hayāt-baḳhsh musalsal payām kis kā hai

jahāñ se ziist kī ra.anā.iyāñ nahīñ jātīñ

hayāt pūchh rahī hai nizām kis kā hai

hai kis kī zulf-e-mo.ambar kī baas phūloñ meñ

ḳhizāñ-badosh bahāroñ kā daam kis kā hai

kiye haiñ kis ko jabīn-e-niyāz ne sajde

ye ehtirām ai bait-ul-harām kis kā hai

'nazīr' apne ḳhudā kī shanāḳht rakhtā hai

shu.ūr kyoñ na ho itnā ġhulām kis kā hai

hasin kaun hai husn-e-dawam kis ka hai

zawal jis ko nahin hai wo nam kis ka hai

ye mai-kada ye surahi ye jam kis ka hai

bara-e-baada-kashan ehtimam kis ka hai

shab-e-firaq munawwar hai kis ke wadon se

dilon mein aas ki surat qiyam kis ka hai

nahin hai koi agar subh ke pas-e-parda

to intizar hamein waqt-e-sham kis ka hai

azal se hai jo dil-e-kaenat ki dhaDkan

hayat-baKHsh musalsal payam kis ka hai

jahan se zist ki ranaiyan nahin jatin

hayat puchh rahi hai nizam kis ka hai

hai kis ki zulf-e-moambar ki bas phulon mein

KHizan-badosh bahaaron ka dam kis ka hai

kiye hain kis ko jabin-e-niyaz ne sajde

ye ehtiram ai bait-ul-haram kis ka hai

'nazir' apne KHuda ki shanaKHt rakhta hai

shuur kyon na ho itna ghulam kis ka hai