hasin KHwab nahin koi zindagi ki tarah

hasīn ḳhvāb nahīñ koī zindagī kī tarah

koī sarāb jahāñ meñ nahīñ ḳhushī kī tarah

fazā meñ tere tabassum ne bijliyāñ bhar diiñ

chamak uThe haiñ añdhere bhī raushnī kī tarah

shab-e-firāq ke baḌhte hue añdheroñ meñ

tum aa ga.e mire āñgan meñ chāñdnī kī tarah

nasīm-e-sub.h kī shabnam kī farhateñ le kar

tum aa.e mere tasavvur meñ tāzgī kī tarah

hai aarzū se tirī zindagī mirī raqsāñ

hai dil meñ pyaar tirā rūh-e-naġhmagī kī tarah

vahī hai shauq kā jazba vahī hai izz-o-niyāz

ki dekh lenā bhī tum ko hai bandagī kī tarah

mujhe pasand hai hañgāma-e-jahāñ vaa.iz

ye zindagī nahīñ jannat kī be-hisī kī tarah

kabhī vo aag kabhī aa ke phuul barsā.eñ

vo bhūlī-bisrī sī yādeñ haiñ zindagī kī tarah

ulajhnā ḳhāroñ se ho sāmnā jo tūfāñ se

raho jahāñ meñ agar shādmāñ kalī kī tarah

'habīb' apnī ġhazal meñ bhī ho vo soz-o-gudāz

jo dil ko moh le kānhā kī bāñsurī kī tarah

hasin KHwab nahin koi zindagi ki tarah

koi sarab jahan mein nahin KHushi ki tarah

faza mein tere tabassum ne bijliyan bhar din

chamak uThe hain andhere bhi raushni ki tarah

shab-e-firaq ke baDhte hue andheron mein

tum aa gae mere aangan mein chandni ki tarah

nasim-e-subh ki shabnam ki farhaten le kar

tum aae mere tasawwur mein tazgi ki tarah

hai aarzu se teri zindagi meri raqsan

hai dil mein pyar tera ruh-e-naghmagi ki tarah

wahi hai shauq ka jazba wahi hai izz-o-niyaz

ki dekh lena bhi tum ko hai bandagi ki tarah

mujhe pasand hai hangama-e-jahan waiz

ye zindagi nahin jannat ki be-hisi ki tarah

kabhi wo aag kabhi aa ke phul barsaen

wo bhuli-bisri si yaaden hain zindagi ki tarah

ulajhna KHaron se ho samna jo tufan se

raho jahan mein agar shadman kali ki tarah

'habib' apni ghazal mein bhi ho wo soz-o-gudaz

jo dil ko moh le kanha ki bansuri ki tarah