حسیں سماں نہ حسیں کائنات ہے شاید

حسیں سماں نہ حسیں کائنات ہے شاید

کسی کا حسن ہی جان حیات ہے شاید

غم حیات سے ہے زندگی میں گیرائی

غم حیات ہی جان حیات ہے شاید

بہت قریب سے دیکھی تھی زندگی کی بہار

مرے خیال سے یہ گل کی بات ہے شاید

وہ ایک لمحہ مسرت سے جو گزر جائے

اسی کا نام متاع حیات ہے شاید

قدم قدم پہ حقیقت قدم قدم پہ مجاز

اسی طلسم میں کل کائنات ہے شاید

ہزار بت شکن آئے مگر نہ توڑ سکے

غرور سب سے بڑا سومنات ہے شاید

ہے جاں گداز بہت عندلیب کا نغمہ

کچھ اس میں دل کی مرے واردات ہے شاید

اداس اداس ہیں شام و سحر کے نظارے

بجھا بجھا سا شرار حیات ہے شاید

کسے خبر جو بنی اپنی جان پر طالبؔ

شکست عشق شکست حیات ہے شاید