hasinon ke gale se lagti hai zanjir sone ki

hasīnoñ ke gale se lagtī hai zanjīr sone kī

nazar aatī hai kyā chamkī huī taqdīr sone kī

na dil aatā hai qaabū meñ na niiñd aatī hai āñkhoñ meñ

shab-e-furqat meñ kyuuñ kar ban paḌe tadbīr sone kī

yahāñ bedāriyoñ se ḳhūn-e-dil āñkhoñ meñ aatā hai

gulābī kartī hai āñkhoñ ko vaañ tāsīr sone kī

bahut bechain huuñ niiñd aa rahī hai raat jaatī hai

ḳhudā ke vāste jald ab karo tadbīr sone kī

ye zarda chiiz hai jo har jagah hai bā.is-e-shaukat

sunī hai ālam-e-bālā meñ bhī ta.amīr sone kī

zarūrat kyā hai rukne kī mire dil se nikaltā rah

havas mujh ko nahīñ ai nāla-e-shab-gīr sone kī

chhapar-khaT yaañ jo sone kī banā.ī is se kyā hāsil

karo ai ġhāfilo kuchh qabr meñ tadbīr sone kī

hasinon ke gale se lagti hai zanjir sone ki

nazar aati hai kya chamki hui taqdir sone ki

na dil aata hai qabu mein na nind aati hai aankhon mein

shab-e-furqat mein kyun kar ban paDe tadbir sone ki

yahan bedariyon se KHun-e-dil aankhon mein aata hai

gulabi karti hai aankhon ko wan tasir sone ki

bahut bechain hun nind aa rahi hai raat jati hai

KHuda ke waste jald ab karo tadbir sone ki

ye zarda chiz hai jo har jagah hai bais-e-shaukat

suni hai aalam-e-baala mein bhi tamir sone ki

zarurat kya hai rukne ki mere dil se nikalta rah

hawas mujh ko nahin ai nala-e-shab-gir sone ki

chhapar-khaT yan jo sone ki banai is se kya hasil

karo ai ghafilo kuchh qabr mein tadbir sone ki