hasinon ke tabassum ka taqaza aur hi kuchh hai

hasīnoñ ke tabassum kā taqāzā aur hī kuchh hai

magar kaliyoñ ke khilne kā natīja aur hī kuchh hai

nigāheñ mushtaba haiñ merī pākīza nigāhoñ par

mire māsūm dil par un ko dhokā aur hī kuchh hai

hasīnoñ se mohabbat hai unhīñ par jaan detā huuñ

mirā sheva hai ye lekin zamānā aur hī kuchh hai

bhalā kyā hosh aa.egā bujhegī kyā lagī dil kī

ye āñchal se havā dene kā manshā aur hī kuchh hai

zabān o aql o dil tārīf se jis kī haiñ begāne

use sajda jo kartā hai vo banda aur hī kuchh hai

tujhe har shai meñ dekhā 'sehr' ne har shai meñ pahchānā

magar phir bhī hai ik parda vo parda aur hī kuchh hai

hasinon ke tabassum ka taqaza aur hi kuchh hai

magar kaliyon ke khilne ka natija aur hi kuchh hai

nigahen mushtaba hain meri pakiza nigahon par

mere masum dil par un ko dhoka aur hi kuchh hai

hasinon se mohabbat hai unhin par jaan deta hun

mera shewa hai ye lekin zamana aur hi kuchh hai

bhala kya hosh aaega bujhegi kya lagi dil ki

ye aanchal se hawa dene ka mansha aur hi kuchh hai

zaban o aql o dil tarif se jis ki hain begane

use sajda jo karta hai wo banda aur hi kuchh hai

tujhe har shai mein dekha 'sehr' ne har shai mein pahchana

magar phir bhi hai ek parda wo parda aur hi kuchh hai