hasrat bhari nazar se wo dekhta hai mujhko

hasrat bharī nazar se vo dekhtā hai mujh ko

kuchh boltā nahīñ hai bas sochtā hai mujh ko

rakhtā hai dil meñ mujh ko palkoñ meñ band kar ke

ḳhvāboñ meñ apne har shab vo kholtā hai mujh ko

merī ḳhabar se mujh ko rakhtā hai bā-ḳhabar vo

mujh se ziyāda shāyad vo jāntā hai mujh ko

ab tak kisī ne aisā chāhā nahīñ kisī ko

jaise ki apne dil se vo chāhtā hai mujh ko

us ko maiñ māñgtā huuñ sajde meñ sar jhukā ke

dast-e-du'ā uThā ke vo māñgtā hai mujh ko

ab mere vāste vo ik aa.ina hai jaise

vo is qadar sarāpā pahchāntā hai mujh ko

hasrat bhari nazar se wo dekhta hai mujh ko

kuchh bolta nahin hai bas sochta hai mujh ko

rakhta hai dil mein mujh ko palkon mein band kar ke

KHwabon mein apne har shab wo kholta hai mujh ko

meri KHabar se mujh ko rakhta hai ba-KHabar wo

mujh se ziyaada shayad wo jaanta hai mujh ko

ab tak kisi ne aisa chaha nahin kisi ko

jaise ki apne dil se wo chahta hai mujh ko

us ko main mangta hun sajde mein sar jhuka ke

dast-e-du'a uTha ke wo mangta hai mujh ko

ab mere waste wo ek aaina hai jaise

wo is qadar sarapa pahchanta hai mujh ko