hasrat bhi aarzu bhi hai dil mein tumhin nahin

hasrat bhī aarzū bhī hai dil meñ tumhīñ nahīñ

sab kuchh hai is makān meñ lekin makīñ nahīñ

da.avā abas hai tum ko ki mujh sā hasīñ nahīñ

duniyā meñ husn vaale haiñ lākhoñ tumhīñ nahīñ

ham un ke jaur-o-zulm se bach kar raheñ kahāñ

kis jā ye āsmān nahīñ ye zamīñ nahīñ

un kā Thikāna un kā patā koī jaane kyā

vo haiñ to sab jagah haiñ nahīñ to kahīñ nahīñ

hai āsmān par na zamīñ par tirī misāl

yaktā hai tū ġharaz tirā saanī kahīñ nahīñ

ai nāla-e-rasā ho zarā aur bhī buland

hai paas duur ab falak-e-haft meñ nahīñ

patthar paḌeñ nasīb meñ mujh bad-nasīb ke

us but ke sañg dar pe jo terī jabīñ nahīñ

kyuuñ aa.ine meñ kaun hai kis kā javāb hai

tum to ye kah rahe tujhe ki mujh sā hasīñ nahīñ

maiñ jā.ūñ ka.aba chhoḌ ke but-ḳhāna kyā zarūr

zāhid hai us kā jalva yahāñ bhī vahīñ nahīñ

nālā-kanāñ hai abr to girya-kunāñ hai abr

furqat meñ terī kis kā dil andoh-gīñ nahīñ

jaate rahe javānī ke saath apne saare josh

'sābir' vo valvale vo umañgeñ rahīñ nahīñ

hasrat bhi aarzu bhi hai dil mein tumhin nahin

sab kuchh hai is makan mein lekin makin nahin

dawa abas hai tum ko ki mujh sa hasin nahin

duniya mein husn wale hain lakhon tumhin nahin

hum un ke jaur-o-zulm se bach kar rahen kahan

kis ja ye aasman nahin ye zamin nahin

un ka Thikana un ka pata koi jaane kya

wo hain to sab jagah hain nahin to kahin nahin

hai aasman par na zamin par teri misal

yakta hai tu gharaz tera sani kahin nahin

ai nala-e-rasa ho zara aur bhi buland

hai pas dur ab falak-e-haft mein nahin

patthar paDen nasib mein mujh bad-nasib ke

us but ke sang dar pe jo teri jabin nahin

kyun aaine mein kaun hai kis ka jawab hai

tum to ye kah rahe tujhe ki mujh sa hasin nahin

main jaun kaba chhoD ke but-KHana kya zarur

zahid hai us ka jalwa yahan bhi wahin nahin

nala-kanan hai abr to girya-kunan hai abr

furqat mein teri kis ka dil andoh-gin nahin

jate rahe jawani ke sath apne sare josh

'sabir' wo walwale wo umangen rahin nahin