hasrat-e-did bar nahin aati

hasrat-e-dīd bar nahīñ aatī

ab vo sūrat nazar nahīñ aatī

koī chuTkī sī dil meñ letā hai

be-sabab aañkh bhar nahīñ aatī

aur sab kuchh hai aadmī meñ magar

ādamiyyat nazar nahīñ aatī

kaam umr-e-ravāñ se le ġhāfil

ye kabhī lauT kar nahīñ aatī

jis se miT jaa.e zulmat-e-hastī

koī aisī sahar nahīñ aatī

un ko apne qarīb paatā huuñ

jab kuchh apnī ḳhabar nahīñ aatī

ek bhī chiiz donoñ aalam kī

dil se afzal nazar nahīñ aatī

raushnī kyā hai raushnī jab tak

zulmatoñ se guzar nahīñ aatī

un kī bātoñ se khul gayā ye 'bahār'

baat bantī nazar nahīñ aatī

hasrat-e-did bar nahin aati

ab wo surat nazar nahin aati

koi chuTki si dil mein leta hai

be-sabab aankh bhar nahin aati

aur sab kuchh hai aadmi mein magar

aadamiyyat nazar nahin aati

kaam umr-e-rawan se le ghafil

ye kabhi lauT kar nahin aati

jis se miT jae zulmat-e-hasti

koi aisi sahar nahin aati

un ko apne qarib pata hun

jab kuchh apni KHabar nahin aati

ek bhi chiz donon aalam ki

dil se afzal nazar nahin aati

raushni kya hai raushni jab tak

zulmaton se guzar nahin aati

un ki baaton se khul gaya ye 'bahaar'

baat banti nazar nahin aati