hasrat-e-did se mamlu dil-e-shaidai hai

hasrat-e-dīd se mamlū dil-e-shaidā.ī hai

sharbat-e-dīd kaf-e-pā kā tamannā.ī hai

kaise tūfān tamannā ke muqābil Thahre

sho.ala-e-ishq lab-e-gosha-e-tanhā.ī hai

sho.ala-e-naḳhvat-o-be-zārī hasad ujb-o-riyā

māne-e-dīd-e-ruḳh-e-yār tamāshā.ī hai

kākul-e-sarv-e-chaman misl-e-mah-e-nau dekhā

chehra-e-yār meñ ījād jabīñ-sā.ī hai

har qadam mehr-o-vafā sidq-o-safā har lamha

paikar-e-ishq ko kahte ho ki harjā.ī hai

kūcha-e-ishq-e-tamannā kā patā de mujh ko

terī furqat meñ mire hoñToñ pe jaañ aa.ī hai

halqa-e-chashm nasheman hai tirī yādoñ kā

ḳhirman-e-yād lab-e-gosha-e-tanhā.ī hai

kaisī duurī hai rag-e-jāñ se ziyāda hai qarīñ

dil ke chilman ke qarīñ tū ne jagah paa.ī hai

kaun pā.egā sazā kaun barī ho.egā

mahfil-e-sham.a meñ parvānoñ kī sunvā.ī hai

ai 'falak maiñ huuñ sag-e-ḳhāk kaf-e-pā us kā

mash.al-e-rāh-e-najāt us kī shanāsā.ī hai

hasrat-e-did se mamlu dil-e-shaidai hai

sharbat-e-did kaf-e-pa ka tamannai hai

kaise tufan tamanna ke muqabil Thahre

shoala-e-ishq lab-e-gosha-e-tanhai hai

shoala-e-naKHwat-o-be-zari hasad ujb-o-riya

mane-e-did-e-ruKH-e-yar tamashai hai

kakul-e-sarw-e-chaman misl-e-mah-e-nau dekha

chehra-e-yar mein ijad jabin-sai hai

har qadam mehr-o-wafa sidq-o-safa har lamha

paikar-e-ishq ko kahte ho ki harjai hai

kucha-e-ishq-e-tamanna ka pata de mujh ko

teri furqat mein mere honTon pe jaan aai hai

halqa-e-chashm nasheman hai teri yaadon ka

KHirman-e-yaad lab-e-gosha-e-tanhai hai

kaisi duri hai rag-e-jaan se ziyaada hai qarin

dil ke chilman ke qarin tu ne jagah pai hai

kaun paega saza kaun bari hoega

mahfil-e-shama mein parwanon ki sunwai hai

ai 'falak main hun sag-e-KHak kaf-e-pa us ka

mashal-e-rah-e-najat us ki shanasai hai