hasrat-e-dida-e-shab-tab liye baiThe hain

hasrat-e-dīda-e-shab-tāb liye baiThe haiñ

apnī āñkhoñ meñ ham ik ḳhvāb liye baiThe haiñ

shahr-e-hastī meñ kuchh aise bhī hameñ log mile

apnī fitrat meñ jo girdāb liye baiThe haiñ

ham ne ḳhud ko bhī khañgālā hai samundar kī tarah

haath meñ gauhar-e-nāyāb liye baiThe haiñ

mujh pe allāh kī rahmat hai jo zinda huuñ maiñ

varna ḳhanjar mire ahbāb liye baiThe haiñ

haq-bayānī se jo Darte haiñ sar-e-mahfil vo

zehn meñ mimbar-o-mehrāb liye baiThe haiñ

zo'm ye hai ki unhīñ ko hī milegī jannat

jo tabāhī ke har asbāb liye baiThe haiñ

dard kyā samjheñge 'sāhil' vo siyah rātoñ kā

apne pahlū meñ jo mahtāb liye baiThe haiñ

hasrat-e-dida-e-shab-tab liye baiThe hain

apni aankhon mein hum ek KHwab liye baiThe hain

shahr-e-hasti mein kuchh aise bhi hamein log mile

apni fitrat mein jo girdab liye baiThe hain

hum ne KHud ko bhi khangala hai samundar ki tarah

hath mein gauhar-e-nayab liye baiThe hain

mujh pe allah ki rahmat hai jo zinda hun main

warna KHanjar mere ahbab liye baiThe hain

haq-bayani se jo Darte hain sar-e-mahfil wo

zehn mein mimbar-o-mehrab liye baiThe hain

zo'm ye hai ki unhin ko hi milegi jannat

jo tabahi ke har asbab liye baiThe hain

dard kya samjhenge 'sahil' wo siyah raaton ka

apne pahlu mein jo mahtab liye baiThe hain