hasrat-e-dil yun nikali jaegi

hasrat-e-dil yuuñ nikālī jā.egī

aarzū meñ jaan Daalī jā.egī

aabrū jab barmalā lī jā.egī

ik nazar bhar ke churā lī jā.egī

āḳhirī ḳhvāhish bhī Taalī jā.egī

teġh kyā un se sañbhālī jā.egī

naaz se duniyā kamā lī jā.egī

haath par sarsoñ jamā lī jaa.e gī

rehn-e-gulshan ho chalā zauq-e-nihāñ

ab nazar sāñche meñ Dhālī jā.egī

kyā ḳhabar thī 'ishq kī tā'mīr meñ

dard kī buniyād Daalī jā.egī

ye to zāhir thā ki bazm-e-husn meñ

'ishq kī pagḌī uchhālī jā.egī

un ko apne bil-muqābil dekh kar

be-ḳhudī kaise sañbhālī jā.egī

dushmanī ke zikr par maa.il haiñ vo

dostī kī baat Taalī jā.egī

bazm-e-ulfat kī nazar meñ ḳhaar huuñ

bad-nigāhī mujh pe Dhālī jā.egī

'shād' rahte kaT ga.ī hai zindagī

nibh sakegī jo nibhā lī jā.egī

hasrat-e-dil yun nikali jaegi

aarzu mein jaan Dali jaegi

aabru jab barmala li jaegi

ek nazar bhar ke chura li jaegi

aaKHiri KHwahish bhi Tali jaegi

tegh kya un se sanbhaali jaegi

naz se duniya kama li jaegi

hath par sarson jama li jae gi

rehn-e-gulshan ho chala zauq-e-nihan

ab nazar sanche mein Dhaali jaegi

kya KHabar thi 'ishq ki ta'mir mein

dard ki buniyaad Dali jaegi

ye to zahir tha ki bazm-e-husn mein

'ishq ki pagDi uchhaali jaegi

un ko apne bil-muqabil dekh kar

be-KHudi kaise sanbhaali jaegi

dushmani ke zikr par mail hain wo

dosti ki baat Tali jaegi

bazm-e-ulfat ki nazar mein KHar hun

bad-nigahi mujh pe Dhaali jaegi

'shad' rahte kaT gai hai zindagi

nibh sakegi jo nibha li jaegi