hasrat-e-paemal mein gum hain

hasrat-e-pā.emāl meñ gum haiñ

ham fareb-e-ḳhayāl meñ gum haiñ

bujhtī yādoñ ke surma.ī saa.e

shām-e-ranj-o-malāl meñ gum haiñ

ham hisār-e-vajūd ke rah-rau

gardish-e-lā-zavāl meñ gum haiñ

sham' insāniyat ke nūr-faroġh

zulmat-e-infi.āl meñ gum haiñ

vo abad tak 'urūj kā partav

ham azal se zavāl meñ gum haiñ

ab bhañvar meñ phañsā hai māhī-gīr

machhliyāñ jaal jaal meñ gum haiñ

lāla-o-gul ye mahr o maah o nujūm

sab tire ḳhadd-o-ḳhāl meñ gum haiñ

shām-e-ġham kī hazār-hā shāmeñ

mere jām-e-sifāl meñ gum haiñ

hijr kī be-panāh rātoñ meñ

log shauq-e-visāl meñ gum haiñ

kashtī-e-zīst khe rahe haiñ 'atash'

bahr kār-e-muhāl meñ gum haiñ

hasrat-e-paemal mein gum hain

hum fareb-e-KHayal mein gum hain

bujhti yaadon ke surmai sae

sham-e-ranj-o-malal mein gum hain

hum hisar-e-wajud ke rah-rau

gardish-e-la-zawal mein gum hain

sham' insaniyat ke nur-farogh

zulmat-e-infial mein gum hain

wo abad tak 'uruj ka partaw

hum azal se zawal mein gum hain

ab bhanwar mein phansa hai mahi-gir

machhliyan jal jal mein gum hain

lala-o-gul ye mahr o mah o nujum

sab tere KHadd-o-KHal mein gum hain

sham-e-gham ki hazar-ha shamen

mere jam-e-sifal mein gum hain

hijr ki be-panah raaton mein

log shauq-e-visal mein gum hain

kashti-e-zist khe rahe hain 'atash'

bahr kar-e-muhaal mein gum hain