hasrat hai teri did ka mausam to ho kabhi

hasrat hai terī diid kā mausam to ho kabhī

āñkhoñ ko ik nigāh kā marham to ho kabhī

garche hai mere dil meñ baserā kiye hue

dhaḌkan se dil kā fāsla mub.ham to ho kabhī

pahlū jalā.e laakh magar tīrgī na de

dhaḌkan meñ chāñd-rāt sā 'ālam to ho kabhī

tere qarīb baiTh ke ahvāl-e-dil kaheñ

ai kaash aisī guftugū bāham to ho kabhī

phir se tilism-e-ḳhvāb meñ rahne lagī hai aañkh

sahrā mirī nigāh kā mahram to ho kabhī

ham haiñ rahīn-e-ārzū aur iltijā bhī haiñ

māñge baġhair diid kā mausam to ho kabhī

dhaḌkan kī bāñsurī meñ nayā soz aa gayā

dil meñ kisī ke pyaar kā sargam to ho kabhī

barsoñ ke baa'd mil ke takalluf sā aa gayā

aapas meñ iltifāt kā 'ālam to ho kabhī

ḳhushbū ke haath aa.e kabhī reshmī payām

merī qabā pe rang kā mausam to ho kabhī

sehn-e-chaman meñ phuul na.ī baat kar gayā

sahrā kisī gulāb kā marham to ho kabhī

garche hai regzār sā merā mizāj par

bārish mire makān pe paiham to ho kabhī

koī pighal rahā thā shab-e-hijr aañkh meñ

soz-e-junūñ kī rāgnī maddham to ho kabhī

kaise pata chalegā ki 'nīlam' ko pyaar hai

vā'da-ḳhilāfī hone pe barham to ho kabhī

hasrat hai teri did ka mausam to ho kabhi

aankhon ko ek nigah ka marham to ho kabhi

garche hai mere dil mein basera kiye hue

dhaDkan se dil ka fasla mubham to ho kabhi

pahlu jalae lakh magar tirgi na de

dhaDkan mein chand-raat sa 'alam to ho kabhi

tere qarib baiTh ke ahwal-e-dil kahen

ai kash aisi guftugu baham to ho kabhi

phir se tilism-e-KHwab mein rahne lagi hai aankh

sahra meri nigah ka mahram to ho kabhi

hum hain rahin-e-arzu aur iltija bhi hain

mange baghair did ka mausam to ho kabhi

dhaDkan ki bansuri mein naya soz aa gaya

dil mein kisi ke pyar ka sargam to ho kabhi

barson ke ba'd mil ke takalluf sa aa gaya

aapas mein iltifat ka 'alam to ho kabhi

KHushbu ke hath aae kabhi reshmi payam

meri qaba pe rang ka mausam to ho kabhi

sehn-e-chaman mein phul nai baat kar gaya

sahra kisi gulab ka marham to ho kabhi

garche hai regzar sa mera mizaj par

barish mere makan pe paiham to ho kabhi

koi pighal raha tha shab-e-hijr aankh mein

soz-e-junun ki ragni maddham to ho kabhi

kaise pata chalega ki 'nilam' ko pyar hai

wa'da-KHilafi hone pe barham to ho kabhi