hasrat ke dagh dast-e-talab se nahin dhule

hasrat ke daaġh dast-e-talab se nahīñ dhule

bhārī the ḳhvāb aañkh se puure nahīñ tule

chakkar bañdhā thā paañv meñ qismat ke pher kā

gard-e-safar ke band abhī tak nahīñ khule

ashkoñ ke zā.iqe meñ namak rah gayā hai kam

ranj-o-malāl Thiik tarah se nahīñ ghule

so.e raheñ haiñ mahal-e-tamannā hazār saal

shahzādiyoñ ke baḳht jabhī to nahīñ khule

rūheñ badan kā saath nibhāne meñ thak rahīñ

yā'nī ki hast-o-būd barābar nahīñ rule

hasrat ke dagh dast-e-talab se nahin dhule

bhaari the KHwab aankh se pure nahin tule

chakkar bandha tha panw mein qismat ke pher ka

gard-e-safar ke band abhi tak nahin khule

ashkon ke zaiqe mein namak rah gaya hai kam

ranj-o-malal Thik tarah se nahin ghule

soe rahen hain mahal-e-tamanna hazar sal

shahzadiyon ke baKHt jabhi to nahin khule

ruhen badan ka sath nibhane mein thak rahin

ya'ni ki hast-o-bud barabar nahin rule