hasrat-o-yas ka ek naqsh-e-pareshan samjha

hasrat-o-yās kā ik naqsh-e-pareshāñ samjhā

hāl-e-uftāda dil-e-shām-e-ġharībāñ samjhā

qābil-e-dād hai us shaḳhs kī rañgīnī-e-fikr

dil-e-ḳhūñ-gashta ko jo ziist kā unvāñ samjhā

be-ruḳhī ne tirī ġhārat kiyā māmūra-e-shauq

aaj dekhā to use shahr-e-ḳhamoshāñ samjhā

yaas ne chhīn lī kyā ishq kī bāliġh-nazarī

vus.at-e-kaun-o-makāñ ko jo ye zindāñ samjhā

kuchh na ban aayā jo sar dhun ke to zehn-e-shā.ir

daftar-e-husn ko tasnīf-e-bahārāñ samjhā

ḳhosha-chīñ shauq hai us tab-e-rasā ke fan kā

jis ke afkār ko maiñ jannat-e-imkāñ samjhā

the vo ḳhalvat-kada-e-nāz ke parde 'qāzī'

barg-e-gul jin ko mirā dīda-e-hairāñ samjhā

hasrat-o-yas ka ek naqsh-e-pareshan samjha

haal-e-uftada dil-e-sham-e-ghariban samjha

qabil-e-dad hai us shaKHs ki rangini-e-fikr

dil-e-KHun-gashta ko jo zist ka unwan samjha

be-ruKHi ne teri ghaarat kiya mamura-e-shauq

aaj dekha to use shahr-e-KHamoshan samjha

yas ne chhin li kya ishq ki baaligh-nazari

wusat-e-kaun-o-makan ko jo ye zindan samjha

kuchh na ban aaya jo sar dhun ke to zehn-e-shair

daftar-e-husn ko tasnif-e-bahaaran samjha

KHosha-chin shauq hai us tab-e-rasa ke fan ka

jis ke afkar ko main jannat-e-imkan samjha

the wo KHalwat-kada-e-naz ke parde 'qazi'

barg-e-gul jin ko mera dida-e-hairan samjha