hasrat se dekhta hun teri rahguzar ko main

hasrat se dekhtā huuñ tirī rahguzar ko maiñ

samjhā.ūñ kis tarah ye dil-e-be-ḳhabar ko maiñ

kyā duuñ javāb un ke ishāroñ kā ham-nashīñ

samjhā nahīñ huuñ aaj tak us fitna-gar ko maiñ

rahbar hī saath hai na hai manzil kā hī nishāñ

rāhoñ se be-ḳhabar huuñ chalā huuñ safar ko maiñ

dekhā karo na pyaar se merī taraf huzūr

bas meñ na rakh sakūñgā phir apnī nazar ko maiñ

is bebasī meñ shauq kī parvāz dekhiye

le hī uḌā huuñ tā.ir-e-be-bāl-o-par ko maiñ

jā.egā jī ke saath hī ye rog ai 'kañval'

lekin ye baat kaise kahūñ chārāgar ko maiñ

hasrat se dekhta hun teri rahguzar ko main

samjhaun kis tarah ye dil-e-be-KHabar ko main

kya dun jawab un ke ishaaron ka ham-nashin

samjha nahin hun aaj tak us fitna-gar ko main

rahbar hi sath hai na hai manzil ka hi nishan

rahon se be-KHabar hun chala hun safar ko main

dekha karo na pyar se meri taraf huzur

bas mein na rakh sakunga phir apni nazar ko main

is bebasi mein shauq ki parwaz dekhiye

le hi uDa hun tair-e-be-baal-o-par ko main

jaega ji ke sath hi ye rog ai 'kanwal'

lekin ye baat kaise kahun chaaragar ko main