hasraten aisi bhi is dil ne saja rakkhi hain

hasrateñ aisī bhī is dil ne sajā rakkhī haiñ

bandisheñ jin pe zamāne ne lagā rakkhī haiñ

baat ġhairoñ kī agar hotī to ham sah lete

barchhiyāñ tanz kī apnoñ ne chalā rakkhī haiñ

ek dīvāne ne is mausam-e-sahrā.ī meñ

barf ke TukḌoñ se qindīleñ banā rakkhī haiñ

us ke zulmoñ kā bhalā kaise maiñ elaan karūñ

jis ne duniyā ko karāmāt dikhā rakkhī haiñ

phir bhī uryānī nahīñ jaatī hai us ke tan kī

jabki poshākoñ pe poshākeñ chaḌhā rakkhī haiñ

ek lamhe ko bhī hāsil nahīñ hotā hai sukūñ

yuuñ to āsā.isheñ duniyā kī kamā rakkhī haiñ

aag denā hī faqat un kā hai manshā 'resham'

sham.eñ bas is liye yāroñ ne jalā rakkhī haiñ

hasraten aisi bhi is dil ne saja rakkhi hain

bandishen jin pe zamane ne laga rakkhi hain

baat ghairon ki agar hoti to hum sah lete

barchhiyan tanz ki apnon ne chala rakkhi hain

ek diwane ne is mausam-e-sahrai mein

barf ke TukDon se qindilen bana rakkhi hain

us ke zulmon ka bhala kaise main elan karun

jis ne duniya ko karamat dikha rakkhi hain

phir bhi uryani nahin jati hai us ke tan ki

jabki poshakon pe poshaken chaDha rakkhi hain

ek lamhe ko bhi hasil nahin hota hai sukun

yun to aasaishen duniya ki kama rakkhi hain

aag dena hi faqat un ka hai mansha 'resham'

shamen bas is liye yaron ne jala rakkhi hain