hasraton mein ab ye ek hasrat hamare dil mein hai

hasratoñ meñ ab ye ik hasrat hamāre dil meñ hai

itnā kah diije ki be-chāra baḌī mushkil meñ hai

ek muusā the ki in kā zikr har mahfil meñ hai

aur ik maiñ huuñ ki ab tak mere dil kī dil meñ hai

aaj kyuuñ had se sivā uljhan hamāre dil meñ hai

kyā nasīb-e-dushmanāñ vo bhī kisī mushkil meñ hai

hai koī aisā jo saaqī se kahe mere liye

ye bhī ik allāh kā banda tirī mahfil meñ hai

yā ilāhī ḳhair yuuñ hamdardiyāñ hotī haiñ aaj

jaise mere dil kā saarā dard unhīñ ke dil meñ hai

dekhnā ye hai un āñkhoñ meñ samā jaatā hai kaun

yuuñ to hone ko zamāna bhar tirī mahfil meñ hai

dekhiye kis ke muqaddar meñ likhī hai ye bahār

aaj to ik haar phūloñ kā kaf-e-qātil meñ hai

dekhiye to apne vahshī kī tasavvur meñ ḳhushī

ghar meñ tanhā hai magar jaise bharī mahfil meñ hai

hai mohabbat koī bīmārī to bīmārī qubūl

haa.e 'manzar' kis maze kā dard apne dil meñ hai

hasraton mein ab ye ek hasrat hamare dil mein hai

itna kah dije ki be-chaara baDi mushkil mein hai

ek musa the ki in ka zikr har mahfil mein hai

aur ek main hun ki ab tak mere dil ki dil mein hai

aaj kyun had se siwa uljhan hamare dil mein hai

kya nasib-e-dushmanan wo bhi kisi mushkil mein hai

hai koi aisa jo saqi se kahe mere liye

ye bhi ek allah ka banda teri mahfil mein hai

ya ilahi KHair yun hamdardiyan hoti hain aaj

jaise mere dil ka sara dard unhin ke dil mein hai

dekhna ye hai un aankhon mein sama jata hai kaun

yun to hone ko zamana bhar teri mahfil mein hai

dekhiye kis ke muqaddar mein likhi hai ye bahaar

aaj to ek haar phulon ka kaf-e-qatil mein hai

dekhiye to apne wahshi ki tasawwur mein KHushi

ghar mein tanha hai magar jaise bhari mahfil mein hai

hai mohabbat koi bimari to bimari qubul

hae 'manzar' kis maze ka dard apne dil mein hai