hasti ko apni shola-ba-daman karenge hum

hastī ko apnī shola-ba-dāmāñ kareñge ham

zindāñ meñ bhī ga.e to charāġhāñ kareñge ham

barham hoñ bijliyāñ ki havā.eñ ḳhilāf hoñ

kuchh bhī ho ehtamām-e-gulistāñ kareñge ham

dāman kī kyā bisāt girebāñ hai chiiz kyā

nazr-e-bahār naqd-e-dil o jaañ kareñge ham

zulmat se be-karāñ to ujāle bhī kam nahīñ

har dāġh-e-dil ko aaj farozāñ kareñge ham

ab dekhte haiñ kaun uḌātā hai rañg-o-bū

apnā lahū sharīk-e-bahārāñ kareñge ham

jin ko fareb-e-shauq meñ aanā thā aa chuke

ab to tire karam ko pashīmāñ kareñge ham

hasti ko apni shola-ba-daman karenge hum

zindan mein bhi gae to charaghan karenge hum

barham hon bijliyan ki hawaen KHilaf hon

kuchh bhi ho ehtamam-e-gulistan karenge hum

daman ki kya bisat gireban hai chiz kya

nazr-e-bahaar naqd-e-dil o jaan karenge hum

zulmat se be-karan to ujale bhi kam nahin

har dagh-e-dil ko aaj farozan karenge hum

ab dekhte hain kaun uData hai rang-o-bu

apna lahu sharik-e-bahaaran karenge hum

jin ko fareb-e-shauq mein aana tha aa chuke

ab to tere karam ko pashiman karenge hum