hasti ko jamal de raha hun

hastī ko jamāl de rahā huuñ

maiñ terī misāl de rahā huuñ

mā'nī pe chaḌhā ke ġhāza-e-nau

lafzoñ ko ḳhayāl de rahā huuñ

maazī pe nigah hai apnī gahrī

fardā ko maiñ haal de rahā huuñ

mushkil bhī hai aur sahl bhī hai

aisā maiñ savāl de rahā huuñ

shīshagarī hai 'ajīb merī

ā.īne ko baal de rahā huuñ

māhaul meñ hai kuchh aisī ḳhunkī

jazbāt ko shaal de rahā huuñ

kyuuñ āriz-e-vaqt ab na nikhre

fan kā hasīñ ḳhaal de rahā huuñ

imroz ke jitne haiñ masā.il

fardā hī pe Taal de rahā huuñ

phañs kar yuuñ shikanje meñ gunah ke

makḌī ko maiñ jaal de rahā huuñ

gumrāh zamāna hai to kyā ġham?

sham-e-mah-o-sāl de rahā huuñ

dil TuuT gayā to kyā 'karāmat'

paiġhām-e-visāl de rahā huuñ

hasti ko jamal de raha hun

main teri misal de raha hun

ma'ni pe chaDha ke ghaza-e-nau

lafzon ko KHayal de raha hun

mazi pe nigah hai apni gahri

farda ko main haal de raha hun

mushkil bhi hai aur sahl bhi hai

aisa main sawal de raha hun

shishagari hai 'ajib meri

aaine ko baal de raha hun

mahaul mein hai kuchh aisi KHunki

jazbaat ko shaal de raha hun

kyun aariz-e-waqt ab na nikhre

fan ka hasin KHal de raha hun

imroz ke jitne hain masail

farda hi pe Tal de raha hun

phans kar yun shikanje mein gunah ke

makDi ko main jal de raha hun

gumrah zamana hai to kya gham?

sham-e-mah-o-sal de raha hun

dil TuT gaya to kya 'karamat'

paigham-e-visal de raha hun