hasti ko teri bas hai miyan gul ki ishaarat

hastī ko tirī bas hai miyāñ gul kī ishārat

kaafī hai mire naale ko bulbul kī ishārat

fatvā talab ai yaar na qaazī se karūñ maiñ

tauba-shikanī ko hai mirī mul kī ishārat

mil baiTh merī āñkhoñ meñ hai sā.at-e-nek aaj

ye chashm tarāzū haiñ tire tul kī ishārat

hai bā.is-e-jam.iyyat-e-dil ek jahāñ kī

ai shoḳh pareshāni-e-kākul kī ishārat

taqvā ke nahīñ baar se qad ḳham tirā ai shaiḳh

ik ḳhalq meñ mash.hūr hai is pul kī ishārat

yaad aa.e tirī zulf na mujh ko jo chaman meñ

de taab mire dil ko na sumbul kī ishārat

ushshāq ko tujh chashm ke hājat nahīñ mai kī

behosh kare 'saudā' ko qulqul kī ishārat

hasti ko teri bas hai miyan gul ki ishaarat

kafi hai mere nale ko bulbul ki ishaarat

fatwa talab ai yar na qazi se karun main

tauba-shikani ko hai meri mul ki ishaarat

mil baiTh meri aankhon mein hai saat-e-nek aaj

ye chashm taraazu hain tere tul ki ishaarat

hai bais-e-jamiyyat-e-dil ek jahan ki

ai shoKH pareshani-e-kakul ki ishaarat

taqwa ke nahin bar se qad KHam tera ai shaiKH

ek KHalq mein mashhur hai is pul ki ishaarat

yaad aae teri zulf na mujh ko jo chaman mein

de tab mere dil ko na sumbul ki ishaarat

ushshaq ko tujh chashm ke hajat nahin mai ki

behosh kare 'sauda' ko qulqul ki ishaarat