haTa do chehre se gar dupaTTa tum apne ai lala-fam aadha

haTā do chehre se gar dupaTTa tum apne ai lāla-fām aadhā

to ho ye sābit ki niklā abr-e-siyah se māh-e-tamām aadhā

huā to hai tere hijr meñ dil hamārā jal kar kabāb saaqī

kasar agar hai to itnī hī hai ki puḳhta aadhā hai ḳhaam aadhā

yahāñ to dil ko mire jalāyā vahāñ jalā.eñge jism merā

ye hashr par kyuuñ uThā rakhā hai huzūr ne intiqām aadhā

hamārī ulfat kā zikr sun kar adū nikāle bhī shiq to kyūñ-kar

ki lafz-e-shiq meñ bhī to ye shiq hai ki hai ye āshiq kā naam aadhā

ye charke de de ke tū ne mujh ko jo nīm-jāñ kar rakhā hai nāhaq

halāl kar Daal ab to zālim huā hai jiinā harām aadhā

ye kaisī dariyā-dilī hai saaqī havas bhī dil kī huī na puurī

jo kī ināyat bhī to adhūrī agar diyā bhī to jaam aadhā

nazar jo paḌ jaa.e us ke qāmat pe bas qayāmat hī aa.e 'anjum'

zamīñ meñ gaḌ jaa.e sarv ḳhajlat se us kī vaqt-e-ḳhirām aadhā

haTa do chehre se gar dupaTTa tum apne ai lala-fam aadha

to ho ye sabit ki nikla abr-e-siyah se mah-e-tamam aadha

hua to hai tere hijr mein dil hamara jal kar kabab saqi

kasar agar hai to itni hi hai ki puKHta aadha hai KHam aadha

yahan to dil ko mere jalaya wahan jalaenge jism mera

ye hashr par kyun uTha rakha hai huzur ne intiqam aadha

hamari ulfat ka zikr sun kar adu nikale bhi shiq to kyun-kar

ki lafz-e-shiq mein bhi to ye shiq hai ki hai ye aashiq ka nam aadha

ye charke de de ke tu ne mujh ko jo nim-jaan kar rakha hai nahaq

halal kar Dal ab to zalim hua hai jina haram aadha

ye kaisi dariya-dili hai saqi hawas bhi dil ki hui na puri

jo ki inayat bhi to adhuri agar diya bhi to jam aadha

nazar jo paD jae us ke qamat pe bas qayamat hi aae 'anjum'

zamin mein gaD jae sarw KHajlat se us ki waqt-e-KHiram aadha