chain pahlu mein use subh nahin sham nahin

chain pahlū meñ use sub.h nahīñ shaam nahīñ

ek dam bhī dil-e-bīmār ko ārām nahīñ

ruḳh-e-pur-nūr nahīñ zulf-e-siyah-fām nahīñ

vo zamāna nahīñ vo sub.h nahīñ shaam nahīñ

shahroñ shahroñ mirī rusvā.ī kā shohrā pahuñchā

mujh sā duniyā meñ koī āshiq-e-bad-nām nahīñ

chāñd hī tāroñ kī jhurmuT meñ zarā dekh ai dil

gaun meñ shoḳh-e-nasārā kī ye bū taam nahīñ

vā.izo jaa.e jahannam meñ fazā-e-jannat

ḳhaar haiñ gul mirī nazroñ meñ jo gulfām nahīñ

naale kartā huuñ kabhī yā kabhī tadbīr-e-visāl

aur to hijr kī shab meñ mujhe kuchh kaam nahīñ

fasl-e-gul aa.ī to kyā be-sar-o-sāmāñ haiñ ham

shīsha-o-jām nahīñ sāqī-e-gul-fām nahīñ

dil gayā diin gayā jaan ga.ī ulfat meñ

aur āġhāz hī dekhā abhī anjām nahīñ

bose do tiin to le lene dī mujh ko lillāh

kaam ke vaqt na kar o but ḳhud kaam nahīñ

laḳhlaḳha kī 'evaz us zulf kī bū sūghuñgā

hai tap-e-ishq meñ saudā mujhe sarsām nahīñ

naz' meñ dekh ke jiitā huuñ tire koThe ko

lab-e-īsā hai ye ai jaan lab-e-bām nahīñ

'mehr' be-lutf hai bazm-e-sho.arā be-ma.ashūq

bulbuleñ chahchahe meñ haiñ koī gulfām nahīñ

chain pahlu mein use subh nahin sham nahin

ek dam bhi dil-e-bimar ko aaram nahin

ruKH-e-pur-nur nahin zulf-e-siyah-fam nahin

wo zamana nahin wo subh nahin sham nahin

shahron shahron meri ruswai ka shohra pahuncha

mujh sa duniya mein koi aashiq-e-bad-nam nahin

chand hi taron ki jhurmuT mein zara dekh ai dil

gaun mein shoKH-e-nasara ki ye bu tam nahin

waizo jae jahannam mein faza-e-jannat

KHar hain gul meri nazron mein jo gulfam nahin

nale karta hun kabhi ya kabhi tadbir-e-visal

aur to hijr ki shab mein mujhe kuchh kaam nahin

fasl-e-gul aai to kya be-sar-o-saman hain hum

shisha-o-jam nahin saqi-e-gul-fam nahin

dil gaya din gaya jaan gai ulfat mein

aur aaghaz hi dekha abhi anjam nahin

bose do tin to le lene di mujh ko lillah

kaam ke waqt na kar o but KHud kaam nahin

laKHlaKHa ki 'ewaz us zulf ki bu sughunga

hai tap-e-ishq mein sauda mujhe sarsam nahin

naz' mein dekh ke jita hun tere koThe ko

lab-e-isa hai ye ai jaan lab-e-baam nahin

'mehr' be-lutf hai bazm-e-shoara be-mashuq

bulbulen chahchahe mein hain koi gulfam nahin