hausla did ka aur tab-e-nazar dekhenge

hausla diid kā aur tāb-e-nazar dekheñge

husn hī husn ke ham shams-o-qamar dekheñge

dekhnā paḌ ga.ī māyūs añdheroñ kī sahar

sochte the ki umīdoñ kī sahar dekheñge

kyā ajab giit bhī bulbul kā sunā.ī de jaa.e

sehn-e-gulzār meñ ik ik gul-e-tar dekheñge

rū-ba-rū un ke koī baat na ham se hogī

apnī ḳhāmosh nigāhoñ kā asar dekheñge

tū ab aa.e ki na aa.e ye tujhī par chhoḌā

umr bhar ham to tirī rāhguzar dekheñge

ham ne mehnat se lagā.e the suḳhan ke paude

sochte the ki kabhī un kā samar dekheñge

ibtidā hī se hai kesh apnā faqat tark-e-rūsūm

chhoḌ kar dair-o-haram aap kā dar dekheñge

apne ā.īna-e-ġham meñ ġham-e-āfāq liye

ġham-e-hastī ko ba-andāz-e-digar dekheñge

zindagī laa.ī nazar meñ jo havādis 'maġhmūm

dekhnā ham nahīñ chāheñge magar dekheñge

hausla did ka aur tab-e-nazar dekhenge

husn hi husn ke hum shams-o-qamar dekhenge

dekhna paD gai mayus andheron ki sahar

sochte the ki umidon ki sahar dekhenge

kya ajab git bhi bulbul ka sunai de jae

sehn-e-gulzar mein ek ek gul-e-tar dekhenge

ru-ba-ru un ke koi baat na hum se hogi

apni KHamosh nigahon ka asar dekhenge

tu ab aae ki na aae ye tujhi par chhoDa

umr bhar hum to teri rahguzar dekhenge

hum ne mehnat se lagae the suKHan ke paude

sochte the ki kabhi un ka samar dekhenge

ibtida hi se hai kesh apna faqat tark-e-rusum

chhoD kar dair-o-haram aap ka dar dekhenge

apne aaina-e-gham mein gham-e-afaq liye

gham-e-hasti ko ba-andaz-e-digar dekhenge

zindagi lai nazar mein jo hawadis 'maghmum

dekhna hum nahin chahenge magar dekhenge