hausla imtihan se nikla

hausla imtihān se niklā

jaan kā kaam jaan se niklā

dard-e-dil un ke kaan tak pahuñchā

baat ban kar zabān se niklā

bevafā.ī meñ vo zamīñ vaalā

haath bhar āsmān se niklā

harf-e-matlab faqat kahā na gayā

varna sab kuchh zabān se niklā

kuchh kī kuchh kaun sunñe vaalā thā

kuchh kā kuchh kyuuñ zabān se niklā

ik sitam miT gayā to aur huā

āsmāñ āsmān se niklā

jis se bachtā thā maiñ dam-e-iz.hār

vahī pahlū bayān se niklā

vo bhī armān kyā jo ai 'muztar'

dil meñ rah kar zabān se niklā

hausla imtihan se nikla

jaan ka kaam jaan se nikla

dard-e-dil un ke kan tak pahuncha

baat ban kar zaban se nikla

bewafai mein wo zamin wala

hath bhar aasman se nikla

harf-e-matlab faqat kaha na gaya

warna sab kuchh zaban se nikla

kuchh ki kuchh kaun sunne wala tha

kuchh ka kuchh kyun zaban se nikla

ek sitam miT gaya to aur hua

aasman aasman se nikla

jis se bachta tha main dam-e-izhaar

wahi pahlu bayan se nikla

wo bhi arman kya jo ai 'muztar'

dil mein rah kar zaban se nikla