ہوا اور روشنی ضروری ہے

ہوا اور روشنی ضروری ہے

اس لئے شاعری ضروری ہے

ساتھ چلتی ہیں کچھ ضرورتیں بھی

رہ میں بازار بھی ضروری ہے

بھول جائیں جسے کہیں رکھ کر

چیز اک کام کی ضروری ہے

ڈوبنے والوں کے لئے بھی تو

ایک کشتی بڑی ضروری ہے

اور اک چیز کی کمی ہے ابھی

اور اک چیز بھی ضروری ہے

گھر میں خالی پڑا ہے اک کمرہ

ذرا سی بے گھری ضروری ہے

پر کیا کرتی ہے جگہ خالی

چیز بے کار بھی ضروری ہے

کبھی خالی بھی رکھا کرتا ہوں

سرزنش جیب کی ضروری ہے