hawa badal gai us bewafa ke hone se

havā badal ga.ī us bevafā ke hone se

vagarna ḳhalq to ḳhush thī ḳhudā ke hone se

ḳhabar nahīñ mujhe matlūb aur kyā hai ki maiñ

ziyāda ḳhush nahīñ arz o samā ke hone se

hamesha bar-sar-e-paikār huuñ kahīñ na kahīñ

mujhe 'ilāqa nahīñ bach-bachā ke hone se

ye sho'la dil se alag ho ke bhī nikal aayā

kuchh aag phail ga.ī hai havā ke hone se

ye shahr kuchh bhī mazāfāt ke baġhair nahīñ

vajūd asl meñ hai māvarā ke hone se

judā.ī chhoḌtī rahtī hai vasl kī ḳhushbū

maiñ zinda rahtā huuñ aksar qazā ke hone se

maiñ purza purza paḌā huuñ jahāñ-tahāñ har samt

ḳhafā sabhī haiñ mire jā-ba-jā ke hone se

zarūrateñ hī mirī ho nahīñ rahīñ puurī

rukā hai qāfila ik be-navā ke hone se

jo rah ga.ī hai ye ek aañch kī kasar to 'zafar'

vo zar-garī thī kisī kīmiyā ke hone se

hawa badal gai us bewafa ke hone se

wagarna KHalq to KHush thi KHuda ke hone se

KHabar nahin mujhe matlub aur kya hai ki main

ziyaada KHush nahin arz o sama ke hone se

hamesha bar-sar-e-paikar hun kahin na kahin

mujhe 'ilaqa nahin bach-bacha ke hone se

ye sho'la dil se alag ho ke bhi nikal aaya

kuchh aag phail gai hai hawa ke hone se

ye shahr kuchh bhi mazafat ke baghair nahin

wajud asl mein hai mawara ke hone se

judai chhoDti rahti hai wasl ki KHushbu

main zinda rahta hun aksar qaza ke hone se

main purza purza paDa hun jahan-tahan har samt

KHafa sabhi hain mere ja-ba-ja ke hone se

zaruraten hi meri ho nahin rahin puri

ruka hai qafila ek be-nawa ke hone se

jo rah gai hai ye ek aanch ki kasar to 'zafar'

wo zar-gari thi kisi kimiya ke hone se