hawa chali to bahut der tak ruki hi nahin

havā chalī to bahut der tak rukī hī nahīñ

tumhārī yaad ki jaise kabhī thamī hī nahīñ

samā.atoñ meñ mirī gūñjtī rahī har dam

vo ek baat jo us ne kabhī kahī hī nahīñ

na jaane kis liye us kā hī intizār rahā

vo ek shaḳhs ki jis se kabhī milī hī nahīñ

havā ne jab bhī uḌāyā ga.ī falak kī taraf

ajiib ḳhaak thī jo ḳhaak meñ milī hī nahīñ

kabhī lagā ki bahut tez-rau rahe lamhe

kabhī lagā ka.ī sadiyoñ se maiñ chalī hī nahīñ

kalī bhī dil meñ mohabbat kī ik hañsī thī magar

kabhī vo bāġh-e-tamannā meñ to khilī hī nahīñ

maiñ ik safīr huuñ 'raziya' gudāz lahjoñ kī

ḳhafā kisī se kabhī der tak rahī hī nahīñ

hawa chali to bahut der tak ruki hi nahin

tumhaari yaad ki jaise kabhi thami hi nahin

samaaton mein meri gunjti rahi har dam

wo ek baat jo us ne kabhi kahi hi nahin

na jaane kis liye us ka hi intizar raha

wo ek shaKHs ki jis se kabhi mili hi nahin

hawa ne jab bhi uDaya gai falak ki taraf

ajib KHak thi jo KHak mein mili hi nahin

kabhi laga ki bahut tez-rau rahe lamhe

kabhi laga kai sadiyon se main chali hi nahin

kali bhi dil mein mohabbat ki ek hansi thi magar

kabhi wo bagh-e-tamanna mein to khili hi nahin

main ek safir hun 'raziya' gudaz lahjon ki

KHafa kisi se kabhi der tak rahi hi nahin