hawa chali to pasina ragon mein baiTh gaya

havā chalī to pasīna ragoñ meñ baiTh gayā

namī kā zahr shajar kī jaḌoñ meñ baiTh gayā

udaas kyuuñ na hoñ ab tere qurb kī sub.heñ

shab-e-firāq kā Dar sā diloñ meñ baiTh gayā

abhī fazāoñ meñ barq-e-sadā hī kaundī thī

zamāna ḳhauf ke maare gharoñ meñ baiTh gayā

na kaam aa sakī a.azā kī chār-dīvārī

makāñ badan kā zamīñ kī tahoñ meñ baiTh gayā

umīd-o-bīm ke saa.e haiñ jis taraf dekhūñ

maiñ chalte chalte ye kin jañgaloñ meñ baiTh gayā

havā kā sāmnā patte ġharīb kyā karte

khaḌā daraḳht bhī tez āñdhiyoñ meñ baiTh gayā

baras paḌīñ mire sar par siyāhiyāñ 'siddīq'

sahar kā rūp-nagar zulmatoñ meñ baiTh gayā

hawa chali to pasina ragon mein baiTh gaya

nami ka zahr shajar ki jaDon mein baiTh gaya

udas kyun na hon ab tere qurb ki subhen

shab-e-firaq ka Dar sa dilon mein baiTh gaya

abhi fazaon mein barq-e-sada hi kaundi thi

zamana KHauf ke mare gharon mein baiTh gaya

na kaam aa saki aaza ki chaar-diwari

makan badan ka zamin ki tahon mein baiTh gaya

umid-o-bim ke sae hain jis taraf dekhun

main chalte chalte ye kin jangalon mein baiTh gaya

hawa ka samna patte gharib kya karte

khaDa daraKHt bhi tez aandhiyon mein baiTh gaya

baras paDin mere sar par siyahiyan 'siddiq'

sahar ka rup-nagar zulmaton mein baiTh gaya