hawa-e-be-taraf-o-fasl-e-be-samar guzri

havā-e-be-taraf-o-fasl-e-be-samar guzrī

tire baġhair guzarnā hī kyā magar guzrī

sharīk-e-shorish-e-duniyā huuñ aur sochtā huuñ

ki sham-e-bazm-e-tarab se bhī chashm-e-tar guzrī

na thī pahāḌ se kuchh kam magar musībat-e-umr

tire ḳhayāl meñ guzrī to muḳhtasar guzrī

koī bhī kaam na aayā shikasta-bālī meñ

sabā bhī shāḳh-e-nasheman ko kaaT kar guzrī

mirī nigāh ne ḳhvāboñ meñ ḳhud ko pahchānā

ki jāgte meñ jo guzrī vo be-basar guzrī

zamāne-bhar se alag ho ke maiñ udhar ko chalā

jidhar jidhar se mire dil kī rahguzar guzrī

hawa-e-be-taraf-o-fasl-e-be-samar guzri

tere baghair guzarna hi kya magar guzri

sharik-e-shorish-e-duniya hun aur sochta hun

ki sham-e-bazm-e-tarab se bhi chashm-e-tar guzri

na thi pahaD se kuchh kam magar musibat-e-umr

tere KHayal mein guzri to muKHtasar guzri

koi bhi kaam na aaya shikasta-baali mein

saba bhi shaKH-e-nasheman ko kaT kar guzri

meri nigah ne KHwabon mein KHud ko pahchana

ki jagte mein jo guzri wo be-basar guzri

zamane-bhar se alag ho ke main udhar ko chala

jidhar jidhar se mere dil ki rahguzar guzri