hawa-e-sham zara sa qayam hoga na

havā-e-shām zarā sā qayām hogā nā

charāġh-e-jāñ ko jalā.ūñ kalām hogā nā

bas ek baat hī pūchhī bichhaḌne vaale ne

kabhī kahīñ pe mile to salām hogā nā

ruḳh-e-jamāl pe shikneñ hī jab sajī hoñgī

to phir hamārā ravayya bhī ḳhaam hogā nā

tirī bahisht meñ hūr-o-qusūr hoñge magar

qarār-e-jāñ kā bhī kuchh intizām hogā nā

kabhī-kabhār hī lekin pukārte haiñ tujhe

hamārā chāhne vāloñ meñ naam hogā nā

agar maiñ ādhā-adhūrā hī lauT aa.uuñ to

nigāh-e-nāz vahī ehtimām hogā nā

bas ek baar mohabbat se dekhnā hai idhar

batāo tum se ye chhoTā sā kaam hogā nā

charāġh jalte raheñ yā ki raakh ho jaa.eñ

tumhāre ātishīñ-ruḳh ko davām hogā nā

hawa-e-sham zara sa qayam hoga na

charagh-e-jaan ko jalaun kalam hoga na

bas ek baat hi puchhi bichhaDne wale ne

kabhi kahin pe mile to salam hoga na

ruKH-e-jamal pe shiknen hi jab saji hongi

to phir hamara rawayya bhi KHam hoga na

teri bahisht mein hur-o-qusur honge magar

qarar-e-jaan ka bhi kuchh intizam hoga na

kabhi-kabhaar hi lekin pukarte hain tujhe

hamara chahne walon mein nam hoga na

agar main aadha-adhura hi lauT aaun to

nigah-e-naz wahi ehtimam hoga na

bas ek bar mohabbat se dekhna hai idhar

batao tum se ye chhoTa sa kaam hoga na

charagh jalte rahen ya ki rakh ho jaen

tumhaare aatishin-ruKH ko dawam hoga na