hawa-e-zindagi bhi kucha-e-qatil se aati hai

havā-e-zindagī bhī kūcha-e-qātil se aatī hai

samajh is baat kī lekin zarā mushkil se aatī hai

yūñhī hotī nahīñ hai vus.at-e-fikr-o-nazar paidā

basārat meñ basīrat dar-haqīqat dil se aatī hai

kamāl-e-ishq kā yuuñ bhī kabhī andāz hotā hai

sū-e-parvāna sham.a chal ke ḳhud mahfil se aatī hai

ḳhayāloñ meñ ġham-e-sūd-o-ziyāñ kuchh bhī nahīñ rahtā

mohabbat kī ye ḳhūbī sa.i-e-lā-hāsil se aatī hai

vo aalam kaun sā aalam hai jo pinhāñ nahīñ mujh meñ

jo gosh-e-fikr vā ho ye sadā bhī dil se aatī hai

koī tūfān bas aane hī vaalā hai samundar meñ

ki bū is baat kī ḳhāmoshī-e-sāhil se aatī hai

nigāheñ qais kī yuuñ hī nahīñ haiñ mahv-e-nazzāra

ziyā lailā kī hai jo parda-e-mahmil se aatī hai

nahīñ aatī hai jab ye to kisī par bhī nahīñ aatī

magar aatī hai jab apnī tabī.at dil se aatī hai

nahīñ rahtā tafāvut jab visāl-o-hijr meñ kuchh bhī

ye manzil intizār-e-shauq meñ mushkil se aatī hai

lahū kī chhīñT tak qātil ke dāman par nahīñ koī

taḌapne kī adā aisī baḌī mushkil se aatī hai

hawa-e-zindagi bhi kucha-e-qatil se aati hai

samajh is baat ki lekin zara mushkil se aati hai

yunhi hoti nahin hai wusat-e-fikr-o-nazar paida

basarat mein basirat dar-haqiqat dil se aati hai

kamal-e-ishq ka yun bhi kabhi andaz hota hai

su-e-parwana shama chal ke KHud mahfil se aati hai

KHayalon mein gham-e-sud-o-ziyan kuchh bhi nahin rahta

mohabbat ki ye KHubi sai-e-la-hasil se aati hai

wo aalam kaun sa aalam hai jo pinhan nahin mujh mein

jo gosh-e-fikr wa ho ye sada bhi dil se aati hai

koi tufan bas aane hi wala hai samundar mein

ki bu is baat ki KHamoshi-e-sahil se aati hai

nigahen qais ki yun hi nahin hain mahw-e-nazzara

ziya laila ki hai jo parda-e-mahmil se aati hai

nahin aati hai jab ye to kisi par bhi nahin aati

magar aati hai jab apni tabiat dil se aati hai

nahin rahta tafawut jab visal-o-hijr mein kuchh bhi

ye manzil intizar-e-shauq mein mushkil se aati hai

lahu ki chhinT tak qatil ke daman par nahin koi

taDapne ki ada aisi baDi mushkil se aati hai