hawa-e-zulm ki shab bhar sana-KHwani bhi hoti hai

havā-e-zulm kī shab bhar sanā-ḳhvānī bhī hotī hai

magar din meñ charāġhoñ ko pashemānī bhī hotī hai

faqat āñkhoñ ke jhukne par sukūñ kī saañs mat lenā

mire dast-e-talab sharminda peshānī bhī hotī hai

jo patthar kī tarah chup hai tire tarz-e-takallum par

use afsos bhī hotā hai hairānī bhī hotī hai

musāhib aur munsif to ba-zāhir zulm karte haiñ

pas-e-parda razā-e-zill-e-sub.hānī bhī hotī hai

bhalā lagtā hai dil kī baat jab jab khul ke kī jaa.e

magar is meñ sharīfoñ ko pareshānī bhī hotī hai

añdheroñ se huā karte haiñ kuchh dar-parda samjhaute

charāġhoñ ke liye phir marsiya-ḳhvānī bhī hotī hai

suno 'tāriq' ham us ehsās-e-nā-guftan ke maare haiñ

jahāñ aajiz ye lafzoñ kī farāvānī bhī hotī hai

hawa-e-zulm ki shab bhar sana-KHwani bhi hoti hai

magar din mein charaghon ko pashemani bhi hoti hai

faqat aankhon ke jhukne par sukun ki sans mat lena

mere dast-e-talab sharminda peshani bhi hoti hai

jo patthar ki tarah chup hai tere tarz-e-takallum par

use afsos bhi hota hai hairani bhi hoti hai

musahib aur munsif to ba-zahir zulm karte hain

pas-e-parda raza-e-zill-e-subhani bhi hoti hai

bhala lagta hai dil ki baat jab jab khul ke ki jae

magar is mein sharifon ko pareshani bhi hoti hai

andheron se hua karte hain kuchh dar-parda samjhaute

charaghon ke liye phir marsiya-KHwani bhi hoti hai

suno 'tariq' hum us ehsas-e-na-guftan ke mare hain

jahan aajiz ye lafzon ki farawani bhi hoti hai