hawa ke dosh pe raqs-e-sahab jaisa tha

havā ke dosh pe raqs-e-sahāb jaisā thā

tirā vajūd haqīqat meñ ḳhvāb jaisā thā

dam-e-vidā.a samundar bichhā rahā thā koī

tamām-shahr hī chashm-e-pur-āb jaisā thā

mirī nigāh meñ rañgoñ kī dhuup chhāñv sī thī

hujūm-e-gul meñ vo kyā thā gulāb jaisā thā

hamārī pyaas ne vo bhī nazāra dekh liyā

ravāñ-davāñ koī dariyā sarāb jaisā thā

jhukī nigāh vo kam kam suḳhan dam-e-iqrār

vo harf harf tirā intiḳhāb jaisā thā

mujhe to sair-e-jahāñ sair-e-bāzgasht huī

tirā jahāñ dil-e-ḳhāna-ḳharāb jaisā thā

shikasta ḳhvāboñ ke TukḌoñ ko joḌte the ham

vo din ajiib thā roz-e-hisāb jaisā thā

hameñ baratne meñ kuchh ehtiyāt lāzim thī

diloñ kā haal shikasta kitāb jaisā thā

maiñ 'shāz' kyā kahūñ kyā raushnī thī rāhoñ meñ

vo āftāb na thā āftāb jaisā thā

hawa ke dosh pe raqs-e-sahab jaisa tha

tera wajud haqiqat mein KHwab jaisa tha

dam-e-widaa samundar bichha raha tha koi

tamam-shahr hi chashm-e-pur-ab jaisa tha

meri nigah mein rangon ki dhup chhanw si thi

hujum-e-gul mein wo kya tha gulab jaisa tha

hamari pyas ne wo bhi nazara dekh liya

rawan-dawan koi dariya sarab jaisa tha

jhuki nigah wo kam kam suKHan dam-e-iqrar

wo harf harf tera intiKHab jaisa tha

mujhe to sair-e-jahan sair-e-bazgasht hui

tera jahan dil-e-KHana-KHarab jaisa tha

shikasta KHwabon ke TukDon ko joDte the hum

wo din ajib tha roz-e-hisab jaisa tha

hamein baratne mein kuchh ehtiyat lazim thi

dilon ka haal shikasta kitab jaisa tha

main 'shaz' kya kahun kya raushni thi rahon mein

wo aaftab na tha aaftab jaisa tha