hawa ki chadar-e-sad-chaak oDhe ja rahe hain

havā kī chādar-e-sad-chāk oḌhe jā rahe haiñ

savāro kis taraf muñh-zor ghoḌe jā rahe haiñ

hameñ bhī yaad kar lenā jab un par phuul aa.eñ

ham apnā ḳhuun paudoñ par nichoḌe jā rahe haiñ

samar to kyā shajar par koī patta bhī nahīñ hai

magar ham haiñ ki shāḳhoñ ko jhinjhoḌe jā rahe haiñ

ye kis sub.h-e-haqīqat meñ khulī hai aañkh merī

ki tere ḳhvāb bhī ab saath chhoḌe jā rahe haiñ

maiñ kis dukh se akele dekhtā jaatā huuñ un ko

fazā meñ panchhiyoñ ke chand joḌe jā rahe haiñ

vo jis kī amn kī buniyād par ta.amīr kī thī

'amīr' us shahr-e-jāñ meñ zulm toḌe jā rahe haiñ

hawa ki chadar-e-sad-chaak oDhe ja rahe hain

sawaro kis taraf munh-zor ghoDe ja rahe hain

hamein bhi yaad kar lena jab un par phul aaen

hum apna KHun paudon par nichoDe ja rahe hain

samar to kya shajar par koi patta bhi nahin hai

magar hum hain ki shaKHon ko jhinjhoDe ja rahe hain

ye kis subh-e-haqiqat mein khuli hai aankh meri

ki tere KHwab bhi ab sath chhoDe ja rahe hain

main kis dukh se akele dekhta jata hun un ko

faza mein panchhiyon ke chand joDe ja rahe hain

wo jis ki amn ki buniyaad par tamir ki thi

'amir' us shahr-e-jaan mein zulm toDe ja rahe hain