hawa mein kuchh to ghula tha ki honT nile hue

havā meñ kuchh to ghulā thā ki hoñT niile hue

gale lagāte hī taaza gulāb piile hue

na dasht-e-jān pe barsī rafāqatoñ kī phuvār

na aañkh meñ chamak aa.ī na lab hī giile hue

añdhere oḌhnā chāhe to badliyāñ chamkīñ

charāġh ujālnā chāhe to laakh hiile hue

tamām raat usī kohar ke jazīre par

ulajh ulajh ke shuāoñ ke haath niile hue

mohabbatoñ ko baḌhāo ki ranjisheñ bhī miTeñ

sukūñ na hogā agar muḳhtalif qabīle hue

kuchh itnī tez hai ye lafz kī sharāb use

kashīd karte hue haath bhī nashīle hue

tahoñ meñ baiThnā chāhā agar kabhī 'sajjād'

gale kā haar ka.ī be-talab vasīle hue

hawa mein kuchh to ghula tha ki honT nile hue

gale lagate hi taza gulab pile hue

na dasht-e-jaan pe barsi rafaqaton ki phuwar

na aankh mein chamak aai na lab hi gile hue

andhere oDhna chahe to badliyan chamkin

charagh ujalna chahe to lakh hile hue

tamam raat usi kohar ke jazire par

ulajh ulajh ke shuaon ke hath nile hue

mohabbaton ko baDhao ki ranjishen bhi miTen

sukun na hoga agar muKHtalif qabile hue

kuchh itni tez hai ye lafz ki sharab use

kashid karte hue hath bhi nashile hue

tahon mein baiThna chaha agar kabhi 'sajjad'

gale ka haar kai be-talab wasile hue