hawa ne dosh pe jhaTka to aab par Thahra

havā ne dosh pe jhaTkā to aab par Thahrā

maiñ kuchh bhañvar meñ girā kuchh habāb par Thahrā

zamīñ se jazb ye pighlī sī nik.hateñ na huiiñ

‘urūs-e-shab kā pasīna gulāb par Thahrā

hamāre shabnamī naġhme usī se uljhe haiñ

kabhī na giit koī jis rabāb par Thahrā

ġham-o-nishāt kā kitnā hasīn sangam hai

ki taarā aañkh se TuuTā sharāb par Thahrā

rupahlī jhiil kī maujoñ meñ iztirāb sā hai

qadam ye kis kā sunahre sarāb par Thahrā

maiñ lafz-e-ḳhām huuñ koī ki tarjumān-e-ġhazal

ye faisla kisī taaza kitāb par Thahrā

hawa ne dosh pe jhaTka to aab par Thahra

main kuchh bhanwar mein gira kuchh habab par Thahra

zamin se jazb ye pighli si nikhaten na huin

‘urus-e-shab ka pasina gulab par Thahra

hamare shabnami naghme usi se uljhe hain

kabhi na git koi jis rabab par Thahra

gham-o-nishat ka kitna hasin sangam hai

ki tara aankh se TuTa sharab par Thahra

rupahli jhil ki maujon mein iztirab sa hai

qadam ye kis ka sunahre sarab par Thahra

main lafz-e-KHam hun koi ki tarjuman-e-ghazal

ye faisla kisi taza kitab par Thahra