حواس و ہوش پہ چھایا خمار کس کا ہے

حواس و ہوش پہ چھایا خمار کس کا ہے

کوئی نہیں ہے تو پھر انتظار کس کا ہے

اگر شبیہ تمہاری ہے آئنہ جیسی

تو پھر یہ پیرہن داغدار کس کا ہے

ہمارے زخموں پہ آنسو ہیں کس کی آنکھوں میں

ہمارے سوگ میں سینہ فگار کس کا ہے

وہی بتائیں جو آلودگی کو روتے ہیں

زمیں سے تا بہ ثریا غبار کس کا ہے

پڑا ملا ہے کہیں ایک چاند کا ٹکڑا

بتائے کون کہ یہ شاہکار کس کا ہے

خوشی پہ رونے لگے اور غم پہ ہنسنے لگے

دل حزیں پہ ظفرؔ اختیار کس کا ہے