hawas-o-hosh pe chhaya KHumar kis ka hai

havās-o-hosh pe chhāyā ḳhumār kis kā hai

koī nahīñ hai to phir intizār kis kā hai

agar shabīh tumhārī hai aa.ine jaisī

to phir ye pairahan-e-dāġh-dār kis kā hai

hamāre zaḳhmoñ pe aañsū haiñ kis kī āñkhoñ meñ

hamāre sog meñ sīna-figār kis kā hai

vahī batā.eñ jo ālūdgī ko rote haiñ

zamīñ se tā-ba-surayyā ġhubār kis kā hai

paḌā milā hai kahīñ ek chāñd kā TukḌā

batā.e kaun ki ye shāhkār kis kā hai

ḳhushī pe rone lage aur ġham pe hañsne lage

dil-e-hazīñ pe 'zafar' iḳhtiyār kis kā hai

hawas-o-hosh pe chhaya KHumar kis ka hai

koi nahin hai to phir intizar kis ka hai

agar shabih tumhaari hai aaine jaisi

to phir ye pairahan-e-dagh-dar kis ka hai

hamare zaKHmon pe aansu hain kis ki aankhon mein

hamare sog mein sina-figar kis ka hai

wahi bataen jo aaludgi ko rote hain

zamin se ta-ba-surayya ghubar kis ka hai

paDa mila hai kahin ek chand ka TukDa

batae kaun ki ye shahkar kis ka hai

KHushi pe rone lage aur gham pe hansne lage

dil-e-hazin pe 'zafar' iKHtiyar kis ka hai