hawas jalwa nahin zauq-e-tamasha bhi nahin

havas jalva nahīñ zauq-e-tamāshā bhī nahīñ

kisī chehre pe tire chehre kā dhokā bhī nahīñ

ġham-gusārī kī tavaqqo.a na dilāse kī umiid

kyā qayāmat hai ki maiñ ishq meñ rusvā bhī nahīñ

vahī mil baiThnā pahroñ vahī ahbāb kī bazm

ḳhud-farebī kā bhalā ho ki maiñ tanhā bhī nahīñ

husn sar-tā-pā taġhāful hai rivāyat ke nisār

tajraba apnā ye kahtā hai ki aisā bhī nahīñ

sāmnā ho to vahī bojh sā jaise dil par

tum se maanā ki kisī baat kā pardā bhī nahīñ

aage aage koī mash.al sī liye chaltā thā

haa.e us shaḳhs kā kyā naam thā pūchhā bhī nahīñ

sirf ḳhalvat kī hai shoḳhī ki abhī tak us ne

'shāz' kah kar mujhe mahfil meñ pukārā bhī nahīñ

hawas jalwa nahin zauq-e-tamasha bhi nahin

kisi chehre pe tere chehre ka dhoka bhi nahin

gham-gusari ki tawaqqoa na dilase ki umid

kya qayamat hai ki main ishq mein ruswa bhi nahin

wahi mil baiThna pahron wahi ahbab ki bazm

KHud-farebi ka bhala ho ki main tanha bhi nahin

husn sar-ta-pa taghaful hai riwayat ke nisar

tajraba apna ye kahta hai ki aisa bhi nahin

samna ho to wahi bojh sa jaise dil par

tum se mana ki kisi baat ka parda bhi nahin

aage aage koi mashal si liye chalta tha

hae us shaKHs ka kya nam tha puchha bhi nahin

sirf KHalwat ki hai shoKHi ki abhi tak us ne

'shaz' kah kar mujhe mahfil mein pukara bhi nahin