hawas ki aag mein jalte hain bezari mein jite hain

havas kī aag meñ jalte haiñ bezārī meñ jiite haiñ

yahāñ kuchh log ab ḳhvāhish kī bīmārī meñ jiite haiñ

ġharīboñ ko kabhī luT jaane kā ḳhatra nahīñ hotā

jam.a karte haiñ jo daulat vo dushvārī meñ jiite haiñ

jahāñ par har hukūmat jā ke sajda-rez hotī hai

pata hai tujh ko ham kis kī amal-dārī meñ jiite haiñ

bane naukar hukūmat ke ga.ī hāthoñ se āzādī

ki ab din-rāt ham file kī almārī meñ jiite haiñ

kisī ke sāmne haath apne phailā.eñ ye nā-mumkin

ġharībī meñ bhī ham itnī vaz.a-dārī meñ jiite haiñ

sadā ham haq ko haq bātil ko bātil likhne vaale haiñ

nahīñ in kī nahīñ un kī taraf-dārī meñ jiite haiñ

unheñ mat DhūñDiye jā kar kisī bazm-e-charāġhāñ meñ

‘amānullāh-ḳhāñ’ to apnī fankārī meñ jiite haiñ

hawas ki aag mein jalte hain bezari mein jite hain

yahan kuchh log ab KHwahish ki bimari mein jite hain

gharibon ko kabhi luT jaane ka KHatra nahin hota

jama karte hain jo daulat wo dushwari mein jite hain

jahan par har hukumat ja ke sajda-rez hoti hai

pata hai tujh ko hum kis ki amal-dari mein jite hain

bane naukar hukumat ke gai hathon se aazadi

ki ab din-raat hum file ki almari mein jite hain

kisi ke samne hath apne phailaen ye na-mumkin

gharibi mein bhi hum itni waza-dari mein jite hain

sada hum haq ko haq baatil ko baatil likhne wale hain

nahin in ki nahin un ki taraf-dari mein jite hain

unhen mat DhunDiye ja kar kisi bazm-e-charaghan mein

‘amanullah-KHan’ to apni fankari mein jite hain