hawas ki duniya mein rahne walon ko main mohabbat sikha raha hun

havas kī duniyā meñ rahne vāloñ ko maiñ mohabbat sikhā rahā huuñ

jahāñ pe dāman bichhe hue haiñ vahāñ par āñkheñ bichhā rahā huuñ

surūd-e-ġham par bhī zindagī meñ tarab ke dhāre bahā rahā huuñ

maiñ un ke sāz-e-jafā par apnī vafā ke naġhme sunā rahā huuñ

ilāhī duniyā meñ aur kuchh din abhī qayāmat na aane paa.e

tire banā.e hue bashar ko abhī maiñ insāñ banā rahā huuñ

adam ke tārīk rāste meñ koī musāfir na raah bhūle

maiñ sham-e-hastī bujhā kar apnī charāġh-e-turbat jalā rahā huuñ

maiñ apnī tarz-e-jūn.un ke sadqe mirā junūñ bhī ajab junūñ hai

kisī kā dāman pakaḌ rahā huuñ kisī se dāman chhuḌā rahā huuñ

abhī to aayā hī thā vahāñ se kabhī na jaane kā ahd kar ke

magar mohabbat zahe mohabbat abhī vahīñ se phir aa rahā huuñ

milī hai kāñToñ kī mujh ko qismat magar hai phūloñ kī merī fitrat

jahāñ huuñ pāmāl-e-ġham huuñ lekin jahāñ bhī huuñ muskurā rahā huuñ

chalā hai shauq-e-sujūd le kar ilāhī ye kis ke dar kī jānib

abhī to pahlā qadam uThā hai abhī se maiñ sar jhukā rahā huuñ

tirī nazar kyā maiñ apne dil se bhī gir ke jaatā huuñ anjuman se

jahāñ ki hotī hai ḳhatm duurī vahāñ se bhī duur jā rahā huuñ

ye kis ke kūche meñ gāmzan huuñ ye āstāñ kis kā sāmne hai

maiñ apne qadmoñ par aaj 'bismil' sar-e-do-ālam jhukā rahā huuñ

hawas ki duniya mein rahne walon ko main mohabbat sikha raha hun

jahan pe daman bichhe hue hain wahan par aankhen bichha raha hun

surud-e-gham par bhi zindagi mein tarab ke dhaare baha raha hun

main un ke saz-e-jafa par apni wafa ke naghme suna raha hun

ilahi duniya mein aur kuchh din abhi qayamat na aane pae

tere banae hue bashar ko abhi main insan bana raha hun

adam ke tarik raste mein koi musafir na rah bhule

main sham-e-hasti bujha kar apni charagh-e-turbat jala raha hun

main apni tarz-e-junun ke sadqe mera junun bhi ajab junun hai

kisi ka daman pakaD raha hun kisi se daman chhuDa raha hun

abhi to aaya hi tha wahan se kabhi na jaane ka ahd kar ke

magar mohabbat zahe mohabbat abhi wahin se phir aa raha hun

mili hai kanTon ki mujh ko qismat magar hai phulon ki meri fitrat

jahan hun pamal-e-gham hun lekin jahan bhi hun muskura raha hun

chala hai shauq-e-sujud le kar ilahi ye kis ke dar ki jaanib

abhi to pahla qadam uTha hai abhi se main sar jhuka raha hun

teri nazar kya main apne dil se bhi gir ke jata hun anjuman se

jahan ki hoti hai KHatm duri wahan se bhi dur ja raha hun

ye kis ke kuche mein gamzan hun ye aastan kis ka samne hai

main apne qadmon par aaj 'bismil' sar-e-do-alam jhuka raha hun