hayat-baKHsh dil-e-mehrban nahin milta

hayāt-baḳhsh dil-e-mehrbāñ nahīñ miltā

mujhe zamīñ pe koī āsmāñ nahīñ miltā

hazār hashr uThāte haiñ ḳhaak ke putle

phir ek roz kisī kā nishāñ nahīñ miltā

nayā hai shahr kahāñ jā ke sar chhupā.ūñgā

vo ajnabī huuñ jise ham-zabāñ nahīñ miltā

ye vo hai gul jo khaTaktā hai ḳhaar kī sūrat

vafā-parast ko dushman kahāñ nahīñ miltā

mazā to jab thā taḌaptī hī charḳh par rahtī

kisī kā ghar tujhe barq-e-tapāñ nahīñ miltā

bas ek dā.era hai jis meñ ghūmtā huuñ maiñ

mire safīne ko āb-e-ravāñ nahīñ miltā

havā kī tezī se hotā hai larza-bar-andām

vo nāḳhudā jise 'azm-e-javāñ nahīñ miltā

kamī bahār kī hai aur na ġhuncha-o-gul kī

sukūn phir bhī sar-e-gulsitāñ nahīñ miltā

maiñ ḳhār-o-ḳhas ko haTātā huuñ rāstoñ se 'falak'

luTā huā jo koī kārvāñ nahīñ miltā

hayat-baKHsh dil-e-mehrban nahin milta

mujhe zamin pe koi aasman nahin milta

hazar hashr uThate hain KHak ke putle

phir ek roz kisi ka nishan nahin milta

naya hai shahr kahan ja ke sar chhupaunga

wo ajnabi hun jise ham-zaban nahin milta

ye wo hai gul jo khaTakta hai KHar ki surat

wafa-parast ko dushman kahan nahin milta

maza to jab tha taDapti hi charKH par rahti

kisi ka ghar tujhe barq-e-tapan nahin milta

bas ek daera hai jis mein ghumta hun main

mere safine ko aab-e-rawan nahin milta

hawa ki tezi se hota hai larza-bar-andam

wo naKHuda jise 'azm-e-jawan nahin milta

kami bahaar ki hai aur na ghuncha-o-gul ki

sukun phir bhi sar-e-gulsitan nahin milta

main KHar-o-KHas ko haTata hun raston se 'falak'

luTa hua jo koi karwan nahin milta