hayat ban ke faza mein machalta jata hun

hayāt ban ke fazā meñ machaltā jaatā huuñ

dayār-e-zīst kā mausam badaltā jaatā huuñ

mire lahū se hazāroñ charāġh raushan haiñ

charāġh-e-ishq huuñ sadiyoñ se jaltā jaatā huuñ

sajā liyā hai ġham-e-kā.enāt se dil ko

nafas-nafas ġham-e-insāñ meñ Dhaltā jaatā huuñ

kahīñ haiñ ḳhaar kahīñ pattharoñ kī bārish hai

maiñ zindagī ke magar saath chaltā jaatā huuñ

hai laġhzishoñ se mirī zindagī kī ra.anā.ī

bahaktā jaatā huuñ jitnā sañbhaltā jaatā huuñ

bujhā sakī na kabhī āñdhiy.oñ kī yūrish bhī

tirā charāġh-e-tamannā huuñ jaltā jaatā huuñ

'payām' maiñ huuñ na.e inqalāb kā naġhma

lahū kī tarah ragoñ meñ machaltā jaatā huuñ

hayat ban ke faza mein machalta jata hun

dayar-e-zist ka mausam badalta jata hun

mere lahu se hazaron charagh raushan hain

charagh-e-ishq hun sadiyon se jalta jata hun

saja liya hai gham-e-kaenat se dil ko

nafas-nafas gham-e-insan mein Dhalta jata hun

kahin hain KHar kahin pattharon ki barish hai

main zindagi ke magar sath chalta jata hun

hai laghzishon se meri zindagi ki ranai

bahakta jata hun jitna sanbhalta jata hun

bujha saki na kabhi aandhiyon ki yurish bhi

tera charagh-e-tamanna hun jalta jata hun

'payam' main hun nae inqalab ka naghma

lahu ki tarah ragon mein machalta jata hun