حیات دل کا ہے دھوکا ممات شر کا فریب

حیات دل کا ہے دھوکا ممات شر کا فریب

یہ شام غم کی ہے الجھن وہ ہے سحر کا فریب

نشان نقش کف پا ہو یا صدائے درا

وہ راہ رو کا ہے دھوکا یہ راہبر کا فریب

خلوص سجدہ نہ ہو اور آستاں کے قریب

جبیں کا اپنی وہ دھوکا یہ سنگ در کا فریب

یہ جز خدا جو نہیں کچھ تو یہ مکان و مکیں

مرے یقیں کا ہے دھوکا مری نظر کا فریب

اٹھائیں دست دعا اور دعا قبول نہ ہو

وہ مدعا کا ہے دھوکا یہ ہے اثر کا فریب

پسند خاطر طبع حزیں حسیں اسعدؔ

وہ اپنے دل کا ہے دھوکا یہ ہے نظر کا فریب