hayat-e-hijr mein dil ki thakan samajhta hun

hayāt-e-hijr meñ dil kī thakan samajhtā huuñ

ḳharāb huuñ ki junūñ kā chalan samajhtā huuñ

samajhtā huuñ ki masīhā nahīñ rahā phir bhī

marīz-e-ishq huuñ apnī lagan samajhtā huuñ

suno ai chāk-garebāñ kiye hue logo

darīda-dil huuñ maiñ TuuTe button samajhtā huuñ

suḳhan karūñ to bahut soch kar nahīñ kartā

maiñ ḳhud ko jaise rivāyat shikan samajhtā huuñ

maiñ barg-e-gul ko bhī chhūtā huuñ narm hāthoñ se

khile gulāb sā us kā badan samajhtā huuñ

sune haiñ sher mire mah-vashoñ ke hoñToñ se

maiñ dostoñ ke diloñ kī jalan samajhtā huuñ

ajiib vahshat-e-girya hai dam-ba-dam 'rāmiz'

ḳhayāl-e-yār ko dam kī ghuTan samajhtā huuñ

hayat-e-hijr mein dil ki thakan samajhta hun

KHarab hun ki junun ka chalan samajhta hun

samajhta hun ki masiha nahin raha phir bhi

mariz-e-ishq hun apni lagan samajhta hun

suno ai chaak-gareban kiye hue logo

darida-dil hun main TuTe button samajhta hun

suKHan karun to bahut soch kar nahin karta

main KHud ko jaise riwayat shikan samajhta hun

main barg-e-gul ko bhi chhuta hun narm hathon se

khile gulab sa us ka badan samajhta hun

sune hain sher mere mah-washon ke honTon se

main doston ke dilon ki jalan samajhta hun

ajib wahshat-e-girya hai dam-ba-dam 'ramiz'

KHayal-e-yar ko dam ki ghuTan samajhta hun