hayat-e-ishq ki KHurshid-samani nahin jati

hayāt-e-ishq kī ḳhurshīd-sāmānī nahīñ jaatī

miTā jaatā hai dil zarroñ kī tābānī nahīñ jaatī

jo kal tak khel samjhe the hameñ barbād kar denā

ab un maġhrūr nazroñ kī pashemānī nahīñ jaatī

hamīñ par lutf kī bārish hai lekin vā.e-nādānī

hamīñ se vo nigāh-e-lutf pahchānī nahīñ jaatī

vatan kyā jur.at-e-ahl-e-junūñ se ho gayā ḳhālī

ḳhirad kī quvvat-e-tajdīd-e-vīrānī nahīñ jaatī

bahār aa.ī khile ġhunche magar ai nāzim-e-gulshan

hamāre āshiyāñ kī sho.ala-sāmānī nahīñ jaatī

mirī sahbā kī azmat sirf ahl-e-dil samajhte haiñ

piye jaatā huuñ lekin pāk-dāmānī nahīñ jaatī

ye kis kāfir-adā kā jalva-e-ma.asūm dekhā hai

'ra.īs' ab tak mirī nazroñ kī hairānī nahīñ jaatī

hayat-e-ishq ki KHurshid-samani nahin jati

miTa jata hai dil zarron ki tabani nahin jati

jo kal tak khel samjhe the hamein barbaad kar dena

ab un maghrur nazron ki pashemani nahin jati

hamin par lutf ki barish hai lekin wae-nadani

hamin se wo nigah-e-lutf pahchani nahin jati

watan kya jurat-e-ahl-e-junun se ho gaya KHali

KHirad ki quwwat-e-tajdid-e-virani nahin jati

bahaar aai khile ghunche magar ai nazim-e-gulshan

hamare aashiyan ki shoala-samani nahin jati

meri sahba ki azmat sirf ahl-e-dil samajhte hain

piye jata hun lekin pak-damani nahin jati

ye kis kafir-ada ka jalwa-e-masum dekha hai

'rais' ab tak meri nazron ki hairani nahin jati