hayat-e-ulfat ki chandni mein masarraton ki kami nahin hai

hayāt-e-ulfat kī chāñdnī meñ masarratoñ kī kamī nahīñ hai

magar muqaddar ko kyā karūñ maiñ nazar vo pahlī jo thī nahīñ hai

vo ibtidā ishq kī thī ham ko gila thā jab dard-e-be-kasī kā

magar shabāb-e-junūñ to dekho shikāyat-e-be-ruḳhī nahīñ hai

tirī mohabbat hai zahr shīrīñ tirī vafā.eñ hasīn dhoke

hai laakh dushman agarche duniyā magar ye tujh se burī nahīñ hai

hazāroñ tūfāñ se ishq khele hazār dil meñ hujūm-e-ġham ho

magar fareb-e-vafā jo khaa.e vo zindagī zindagī nahīñ hai

kamāl-e-ishq-o-vafā ke partav jahāñ-tahāñ jagmagā rahe haiñ

ye sab fareb-e-nigāh-o-dil hai kisī meñ kuchh dilkashī nahīñ hai

vo aur hoñge aish-e-duniyā kī ārzūoñ meñ mar rahe haiñ

vo chiiz maiñ kyoñ pasand kar luuñ jo hāsil-e-bandagī nahīñ hai

tirī vafāoñ ke āsare par had-e-tasavvur se baḌh gayā huuñ

maqām aisā ab aa gayā hai tirī kamī bhī kamī nahīñ

javān hai ab mirī mohabbat shabāb par haiñ mirī duā.eñ

hai mauqa.a-e-ḳhud-kushī to ai 'raaj himmat-e-ḳhud-kushī nahīñ hai

hayat-e-ulfat ki chandni mein masarraton ki kami nahin hai

magar muqaddar ko kya karun main nazar wo pahli jo thi nahin hai

wo ibtida ishq ki thi hum ko gila tha jab dard-e-be-kasi ka

magar shabab-e-junun to dekho shikayat-e-be-ruKHi nahin hai

teri mohabbat hai zahr shirin teri wafaen hasin dhoke

hai lakh dushman agarche duniya magar ye tujh se buri nahin hai

hazaron tufan se ishq khele hazar dil mein hujum-e-gham ho

magar fareb-e-wafa jo khae wo zindagi zindagi nahin hai

kamal-e-ishq-o-wafa ke partaw jahan-tahan jagmaga rahe hain

ye sab fareb-e-nigah-o-dil hai kisi mein kuchh dilkashi nahin hai

wo aur honge aish-e-duniya ki aarzuon mein mar rahe hain

wo chiz main kyon pasand kar lun jo hasil-e-bandagi nahin hai

teri wafaon ke aasare par had-e-tasawwur se baDh gaya hun

maqam aisa ab aa gaya hai teri kami bhi kami nahin

jawan hai ab meri mohabbat shabab par hain meri duaen

hai mauqa-e-KHud-kushi to ai 'raj himmat-e-KHud-kushi nahin hai