hayat ek silsila hai aashufta-jaaniyon ka

hayāt ik silsila hai āshufta-jāniyoñ kā

milā mujhe ḳhuub ye sila jāñ-fishāniyoñ kā

fareb-deh hai junūñ baqā kī nishāniyoñ kā

ye ‘ālam-e-āb-o-gil hai ijlās fāniyoñ kā

nigāh-afroz kaif-andoz-o-‘aish-āmoz

hai ek sail-e-nashāt uThtī javāniyoñ kā

junūn-e-shā'ir shu'ūr-e-'ālim riyāz-e-‘ābid

hai sab ko andāz apnī apnī ravāniyoñ kā

bashar ke dil meñ falak kī nīlāhaToñ kī aahaT

zamīñ kī halchal fusūñ samundar ke pāniyoñ kā

mujhe ye Dar hai kahīñ na ho shahr-shahr charchā

tirī jafā kī mirī vafā kī kahāniyoñ kā

ye aadmī aadmī ke biich ūñch-nīch yārab

banā hai ye tafraqa tamāshā jahāniyoñ kā

visāl meñ ham the itne mad.hosh jānte kyā

ki soz-e-hirmāñ hai mā-hasal shādmāniyoñ kā

hayāt aur maut haiñ tirī dilbarī ke ġhamze

tamāshā-gah hai jahāñ tirī dil-sitāniyoñ kā

ye garm aañsū ye sard aa.heñ hazīñ nigāheñ

ḳhayāl rakhnā mirī vafā kī nishāniyoñ kā

vo kaise mere dil-e-shikasta kā dard jāneñ

hujūm hai jin kī zindagī kāmrāniyoñ kā

kahāñ hai chāhat kī dilkash-o-dil-navāz ranjish

hai tazkira har jagah tirī mehrbāniyoñ kā

udaas hairāñ shabāb merā hadaf rahā hai

tumhārī rātoñ kī dil-shikan sargirāniyoñ kā

vo shor uThā lā-shu’ūr kī nannhī bastiyoñ meñ

ġhurūr TuuTā shu'ūr kī rājdhāniyoñ kā

panāh detī hai paap ko kyoñ vishāl dhartī

vichār aisā samajh kā hai pher gyāniyoñ kā

ye kaisī biptā paḌī hai sansār par ki ai dil

na dhiir qaa.em na dhyān baaqī hai dhyāniyoñ kā

maiñ us pe shaidā huā huuñ muddat se 'krishn-mohan'

jo dil meñ ras gholtā hai shīrīñ-bayāniyoñ kā

jadīd rāhoñ kā shoḳh raahī hai 'krishn-mohan'

vo ham-navā hai na.e tamaddun ke bāniyoñ kā

hayat ek silsila hai aashufta-jaaniyon ka

mila mujhe KHub ye sila jaan-fishaniyon ka

fareb-deh hai junun baqa ki nishaniyon ka

ye ‘alam-e-ab-o-gil hai ijlas faniyon ka

nigah-afroz kaif-andoz-o-‘aish-amoz

hai ek sail-e-nashat uThti jawaniyon ka

junun-e-sha'ir shu'ur-e-'alim riyaz-e-‘abid

hai sab ko andaz apni apni rawaniyon ka

bashar ke dil mein falak ki nilahaTon ki aahaT

zamin ki halchal fusun samundar ke paniyon ka

mujhe ye Dar hai kahin na ho shahr-shahr charcha

teri jafa ki meri wafa ki kahaniyon ka

ye aadmi aadmi ke bich unch-nich yarab

bana hai ye tafraqa tamasha jahaniyon ka

visal mein hum the itne madhosh jaante kya

ki soz-e-hirman hai ma-hasal shadmaniyon ka

hayat aur maut hain teri dilbari ke ghamze

tamasha-gah hai jahan teri dil-sitaniyon ka

ye garm aansu ye sard aahen hazin nigahen

KHayal rakhna meri wafa ki nishaniyon ka

wo kaise mere dil-e-shikasta ka dard jaanen

hujum hai jin ki zindagi kaamraniyon ka

kahan hai chahat ki dilkash-o-dil-nawaz ranjish

hai tazkira har jagah teri mehrbaniyon ka

udas hairan shabab mera hadaf raha hai

tumhaari raaton ki dil-shikan sargiraniyon ka

wo shor uTha la-shu’ur ki nannhi bastiyon mein

ghurur TuTa shu'ur ki rajdhaniyon ka

panah deti hai pap ko kyon wishaal dharti

wichaar aisa samajh ka hai pher gyaniyon ka

ye kaisi bipta paDi hai sansar par ki ai dil

na dhir qaem na dhyan baqi hai dhyaniyon ka

main us pe shaida hua hun muddat se 'krishn-mohan'

jo dil mein ras gholta hai shirin-bayaniyon ka

jadid rahon ka shoKH rahi hai 'krishn-mohan'

wo ham-nawa hai nae tamaddun ke baniyon ka