hayat raqs mein hai kaenat raqs mein hai

hayāt raqs meñ hai kā.enāt raqs meñ hai

charāġh-e-bāda jalāo ki raat raqs meñ hai

sitāre aa.e haiñ zarroñ kī bandagī ke liye

naved-e-sub.h mubārak hayāt raqs meñ hai

kuchh is adā se chalā qāfila gunāhoñ kā

numūd-e-sub.h se ab tak najāt raqs meñ hai

hai ek hashr sā barpā zamīñ ke siine meñ

kuchh is tarah nafas-e-hādsāt raqs meñ hai

ye kaun maut ke chehre pe mal gayā kālak

fanā kī āñkheñ haiñ nam aur sabāt raqs meñ hai

qarīb hī kahīñ pyāsoñ kā qāfila to nahīñ

machal rahe haiñ kināre furāt raqs meñ hai

ḳhudā pe jab se burā vaqt aa gayā 'qaisar'

hubal ke lab pe hai naġhma manāt raqs meñ hai

hayat raqs mein hai kaenat raqs mein hai

charagh-e-baada jalao ki raat raqs mein hai

sitare aae hain zarron ki bandagi ke liye

nawed-e-subh mubarak hayat raqs mein hai

kuchh is ada se chala qafila gunahon ka

numud-e-subh se ab tak najat raqs mein hai

hai ek hashr sa barpa zamin ke sine mein

kuchh is tarah nafas-e-hadsat raqs mein hai

ye kaun maut ke chehre pe mal gaya kalak

fana ki aankhen hain nam aur sabaat raqs mein hai

qarib hi kahin pyason ka qafila to nahin

machal rahe hain kinare furaat raqs mein hai

KHuda pe jab se bura waqt aa gaya 'qaisar'

hubal ke lab pe hai naghma manat raqs mein hai